Job 22

Eliphaz

1 Tua ciangin Teman mi Eliphaz in dawng a: ^a

2 “Mi khat in Pasian phatuamsak thei ahi hiam? ^b
Mipil khat nangawn in amah phatuamsak thei ahi hiam? ^c
3 Note thumaanna in Thahatpenpa tungah bang phatuamsak ahi hiam? ^d
Na nuntakna paubaang kei leh amah in bang lawhtak ahi hiam?
4 “Na biakna-mina dingin amah in nang hong tai a,
nang hong thuaksak sa na hi hiam? ^e
5 Na gitlohna a liat hang hi lo ahi hiam?
Na mawhnate a bei theih loh hang hi lo ahi hiam?
6 A thu om lopi in na sanggampa tung panin kiciamna na mawk nget a; ^f
mi puan hawkkhiatsakin a guaktangin na nusia hi. ^g
7 A gimte tui pia loin ^h
gilkialte an na pia kei a ⁱ 8 nang leitang a teng mi vanglian-
mi zahtak khat hi napi tuate na dek tentan hi. ^j
9 Meigongte khutguakin na hawlkhia a, ^k
pa nei lote hatna na sutan hi. ^l
10 Tua hangin na kimkotah thang hong kisiah a, ^m
tua hang mahin launa lianpi in thakhatin nang hong phawng a, ⁿ
11 tua hang mahin na muh theih lohin khua mialvat a, ^o
tua hang mahin tuikhang in nang hong tuum hi. ^p
12 “Vantung a sannate ah Pasian om hi lo ahi hiam? ^q
En dih ve, aksi sangpente nak san na lawmlawm e!
13 Tua hi napi, ‘Pasian in bang thei hiam? ^r
Tua zaha khuamial lakah thu khen thei ding hiam? ^s
14 Amah meii sahpi in tuamcip hi, ^t
tua ahi ciangin vante khumzangah a pai kawmin ^u
eite hong mu thei lo ding hi,’ na ci lai hi.
15 Migilote totsa lampi lui mah
tawn lai na hi hiam?
16 Amau hun a cin ma-in amaute kipuamang hi; ^v
amau bulkipte tuikhang in nawtmang hi. ^w
17 Amaute in Pasian kiangah, ‘Ko hong nawngkaisak kei in!
A Thahatpenpa in ko tungah bang hih thei hiam?’ ci uh hi. ^x
18 Tua a cihpa uh, na hoih tawh amaute inn a dimsakpa hi lai hi, ^y
tua ahi ciangin migilote ngaihsutna le kei aa kigamla hi.
19 “A thumaante in amaute siatna a muh uh ciangin lungdam uh hi; ^z
a mawhpengte in amaute zahpihin, ^aa
20 ‘I galte kisia takpi a ^ab
a hauhna teng uh mei in kangtum khin hi,’ ci uh hi. ^ac
21 “Pasian tung ki-ap lel inla, amah tawh kilem in; ^ad
hi bang lamin na daupai zaw ding hi. ^ae
22 A kama hong lamlahna mang inla ^af
na lungsim sungah ama kammalte kemcing in. ^ag
23 A Thahatpa lamah na kihei kik leh na ngeina hong bangsak ding hi. ^ah
Na puanbuk pan gamlapi ah gitlohna na paihmang a, ^ai
24 na khamvuite leivui-in ngaihsunin, ^aj
na Ophir khamte gun suangtum bangin ngaihsun lel lecin,
25 tua ciangin a Thahatpenpa na kham hong hi dinga, ^ak
na ngun deih pen hong hi ding hi.
26 Tua ciangin Thahatpenpa sungah nuam na sa taktak dinga,
Pasian lamah na dakto ding hi. ^al
27 Ama tungah thu na ngen dinga, amah in hong za ding hi; ^am
tuateh na kiciamna na tangtun ding hi. ^an
28 Na lungsim khentatna kitangtungsak dinga,
na lampi ah khuavak a tang ding hi. ^ao
29 Mite in mi a niamsak ciangin, ‘Amaute phong to un!’ na ci a, ^ap
tua ciangin amah in a tukpa a honkhia ding hi. ^aq
30 Amah in mawhpeng lo pa khat nangawn hukhia dinga, ^ar
na khut sianthona hanga amah a kihonkhia hi ding hi,” a ci hi. ^as